Бурханы шашны портал

Нэвтрэх | Бүртгүүлэх | Нууц үгээ мартсан

  • Хамаг амьтан орчлонгийн хуулийг танин мэдэж, зовлон бүхний ёзоор болсон мунхаг сэтгэлээсээ хагацах болтугай.

Надад сүжиглэж бишрэх эсэх нь төдийлөн чухал бус аа!

Шэндормо өглөгийн эзэн өгүүлрүүн: “Аугаа Богд эцэг минь! Та гурван цагийн хамаг Бурхад лугаа огт өөрцгүй бөлгөө. Тан лугаа учрах ерөөл барилдлагатай хүмүүн сайтар өргөн хүндлээд шавь орж ном буяны үйлд шамдах ёстойг өгүүлэх юун! Харин тантай уулзан учраад бишрэл хүндлэл эс төрөгч байх аваас адгуус малаас дор мунхаг гэгч тэр буй за!” гэхэд

Мила Богд хариуд нь зарлиг болруун: “Надад сүжиглэж бишрэх эсэх нь төдийлөн чухал бус аа! Харин чөлөө учрал бүрдсэн эрдэнэт хүмүүний биеийг олж төрөөд цог жавхлант Бурханы шажин лугаа учирсан энэ цагт дээдийн номыг үл хичээгч нар байваас жинхэнэ харанхуй мунхагийн туйл гэгч тэр болой” хэмээгээд ийн дуулжээ:
«Өндөр дээд Марва ламын хөлд сөгдмүй
Өглөгийн эзэд та нар сонсогтун!
Сайвар одогсоны ном дэлгэрсэн энэ ертөнцөд
Санаан зоргоор нүгэл үйлдэгчид юутай мунхаг
Олдохуйяа бэрх хүмүүн заяанд тохиочихоод
Орчлонг талаар өнгөрөөгчид юутай мунхаг
Хот хүрээний шоронгоос өөрцгүй амьдралд
Хоргодон суугч хүмүүн юутай мунхаг
Зочлон ирснээс өөрцгүй эхнэр нөхрүүд
Зодоон хэрүүл хийх нь юутай мунхаг
Хөндийн цуурианаас өөрцгүй алдар нэрийн хойноос
Хөөцөлдөн гүйгчид аваас юутай мунхаг
Өстөн дайсан хагдрах цэцэгнээс өөрцгүй байтал
Өөрийн амиараа тэмцэгчид юутай мунхаг
Үнэнч нөхөд агаар дахь зурагнаас өөрцгүй байтал
Үхэл егүүдэхийн цагт салж ядах нь юутай мунхаг
Хэврэг ёст эд таваар шүүдэр мэт бөгөөтөл
Хэтэрхий түүнд хүлэгдэх нь юутай мунхаг
Эвдрээд унах тавилантай энэ биеийг
Элдвээр чимэглэн хээнцэрлэгч юутай мунхаг
Ариун увдист рашааны идээ байсаар байтал
Ашиг завшаан эрэлхийлэгч юутай мунхаг
Орчлон хорвоогийн мунхаг ард юутай олон
Онцгой гэгээн ухаантан тоотой хэдхэн
Өвгөн егүзэри миний нууц явдлыг үлгэрлэн
Өдгөө та бүхэн Бурханы номд шамдагтун!» хэмээв.

Орчуулсан Д.Болдбаатар

  • ЗочинApril 8, 2013

    Орчин цагийн мунхаг бидэнд юутай тохирсон гүр дуулал вэ, бид ч цагийг энэ мэтчилэн өнгөрөөж байна даа

Бусад мэдээлэл
2012-09-11