Бурханы шашны портал

  • Хамаг амьтан орчлонгийн хуулийг танин мэдэж, зовлон бүхний ёзоор болсон мунхаг сэтгэлээсээ хагацах болтугай.

Тарваганы үг

Эрт урьд цагийн үйлийн эрхээр
Эгэл тарваганы төрлийг авч
Эзгүй хоосон жалгад алмайран эргэж
Энд тэндхийн хад ууланд бүгж байтал
Энэ жилийн элчтэй дулаан цаг ирээд
Ээлжилсэн зургаан сар нь, гармагц
Эрхгүй ил гарч, элдэв зүйлийн өвсийг идээд
Эцэн турж, ядан цөхөн байж байтал
Хөх манхан тэнгэрийн хөвсөн их хур нь бууж
Хөрстэй газар дэлхийн хөх ногоо нь дэлгэрээд
Хөөргөмшиж баясгалантайгаар идээд
Хөлбөрч хэвтэн амар заяатай орогнож байтал
Аймшигтай үйлийн эрхээр
Арьс минь үнэтэй болж
Анчин гөрөөчин элбэгшиж
Амийг хадгалах арга барагдахад
Аль ч зүйлээр санаж бодохноо
Аминаас хайртай эдлэл огт үгүй
Аюултай зовлон үүнээс эс гэтэлбээс
Аяа, би чинь, авай хөөрхий
Газар доогуур шургаж орвоос
Гал утаагаар хөөргөдөх буюу гох дэгээгээр татах
Гадас царилаар ухах буюу
Гавх /хавх/ зүүхээр барих нь зайлалтгүй
Гадагш гарч явах болоход ч
Галтай буугаар буудаж алах нь зайлалтгүй
Галтар /халтар/ нохой харайж барих нь зайлалтгүй
Гаслан зовлонд нэрвэгдсэн наймаг харгалз
Харгалдаж хариуцах гэтэл бяр чадал минь бага
Харайж зугатах гэтэл хөл минь богинохон
Харваж алалцалдъя гэтэл буу сум ч үгүй
Хагалж бүлж хорлоё гэтэл мэс алин ч үгүй
Хариу тавихын чадал ч үгүй
Хаа явавч орон ч үгүй
Хамаг гашуун зовлонгоос ийн өгүүлснийг минь
Хамжих дэмжих нөхөр буй болбоос харж харгалз
Тогоо дүүрэхгүй махаар уршиглав уу
Тохой дүүрэхгүй арьсаар уршиглав уу
Тон /тун/ муу төрлийг авснаар уршиглав уу
Тонилж чаддаггүй өөрөөсөө уршиглав уу
Өлсөж өлбөрөх гэгч өөрийн эрх үгүй тул
Өдөр бүр өвс хоолонд гүйтэл
Өөрийн эдгүй өлссөн чоно шиг
Өндийж гэтсээр ирдэг энэ чинь
Өссөн сэтгэл буй болоод алъя гэж санав уу
Өлсөн ядраад цадъя гэж дурлав уу
Өнөөгийн өдрийн үйлдсэн төдийгөөр өнгөрнө гэж санав уу
Өнөд удаан зовлонг эдэлнэ гэж санав уу
Өөрийн чинь биенээс өөргүй биздээ
Өрөвдөж намайгаа алахын хэрэг үгүй сэн
Өнгөрсөн жилийн алсны үнээс үлдсэн нь
Өнөөгийн өдрийн үест хэдийхэн нэгэн байн байтал
Амьтныг алсны асар боловсрол нь
Амлашгүй зовлонг эдэлнэ
Амийг ивгээгч нь тэнгэр хүмүүний амар заяанд байхыг
Адгийн эгэл би ч мэдэж байна
Хорлол хөнөөлийг бүү үйлд, хорлож алснаас
Хойд урьд ганзгандаан хоёр гурвыг угсруулж
Хортон дайсныг дарсан мэтийн байдалтай байхдаа
Хойтын насаа магадтай мартаагүй биз.
Эрлэг тамын газарт эсэргэлдэн заргалдахын цагт
Энд дийлэхтэйгээн адил тэнд дийлнэ гэх магад үгүйн тул
Эцэстээ гөрөөчин чи эвий хөөрхий
Энэхэн үесдээ би ч бас хөөрхий
Энэнээс эхлээд бодь хутгийг олох хүртэл
Эглийн төрлийг авалгүй
Энх амгалант оронд төрөх болтугай
Алсдаан эглийн биеийг орхиж
Амгалан оронд төрөх болтугай
Алинд тавьсан ерөөлийн ачаар
Амьтан бүгд бурхан болох болтугай
Ачтан ламын зарлигийн ачаар
Авралт орон хийдэд оршсоны хүчээр
Анистай бэрх ёсыг эс мэдсэн боловч
Амар хялбар бага сага үгс төдийхнийг мэдээд
Омгийн сэтгэлээр өгүүлсэн бус бөгөөд
Олон амьтанд тус болох нь өчүүхэн боловч
Ойчин цойчин нэгэн хоёрт туслахыг горилж
Онцгүй хэдэн үгийг бичиж үйлдсэн нь
Гарз олз нь багын тулд
Ганц ч хүнд огт үзүүлэлгүй
Галд түлье гэж завдсанаа
Гайхалзан татгалзаж, эргүүлэн татаж авав.

Эрдэнэ мэргэн бандида Агваан-Ишсамбуу
/Л. Хүрэлбаатарын орчуулга/

    Бусад мэдээлэл