Бясалгал / Гэгээрэхүй шүлгийн цомгоос /

Бясалгал гэдэг бие хэл сэтгэлийн үйлдлийн давтамж
Бас тэгээд сэтгэлийг жолоодох урлаг ухаан
Бүр цаашилбал амьддаа үхэж сурах арга техник
Бурхантай ярилцах цаг түүнтэй нэвтрэх чимээгүй хэл

Биеээр үйлдэх дасгал нь биеийг эрүүлжүүлэх бясалгал
Байнга хэлээр давтах тарни нь явдлыг засах шидэт үгс
Бодлоор хийх төвлөрөл нь сэтгэлийг таних түлхүүр
Булт эдгээр үйлүүд бясалгалын гадаад ялгамж чанар

Сэтгэлийг жолоодох гэдэг бие хэлийг удирдахын үндэс
Сэтгэлийг таних урлаг нь дотоод руугаа төвлөрөх бясалгал
Сэтгэлийг хянах арга нь байнгын сэрэмж ухамсар
Сэтгэлийг удирдахын зорилго нь бясалгалын дотоод мөн чанар

Бясалгалын энгийн зорилт нь эрүүл байхын хүсэл
Бясалгалын удаах түвшин бол шидийг олох сэтгэл
Бясалгалын дээд зорилго нь зовлонгоос ангижрах явдал
Бүгд эдгээрийн оргил нь гэгээрэл ба нирвааны зам мөр

Бясалгал гэдэг шашин шүтлэг бус сэтгэлийн дасгал
Бясалгал бол итгэл үнэмшил биш арга техник
Бясалгал нь ашиг хонжоо бус биеэ удирдах урлаг
Бясалгал гэдэг ухаарал хайр амар амгалангийн үүд

Бясалгалын оршил хэсэг үхэл мөнх бусын ухаарал
Бясалгалын эхлэл гараа нь магад гарахуйн сэтгэл
Бясалгалын өрнөл үе нь билиг ухааныг танихуй
Бясалгалын тайлал төгсгөл нь бодь сэтгэлийг олохуй буюу гэгээрэл

Ө.Батболд